本來於今年1月1-4號舉行嘅動漫節，因為疫情關系被迫取消，一眾動漫迷相信必定非常失望，特別係唔少人可能諗住去現場直接買走近期爆紅嘅全套漫畫，其中包括《鬼滅の刃》。

不過香港人出名多諗頭，所以又點會咁易投降，東立出版社近日就決定喺荃灣舉行一個小型動漫展，其中多套大熱漫畫將會展出及發售，其中值我關注嘅包括最新推出嘅《新蠟筆小新#10》。

小新方面亦有部份可愛精品，啱晒小新迷嘅你！

另外，值得一眾《鬼滅》迷瘋狂嘅就係今次動漫展出將首度發售從未曝光嘅「鬼滅之箱」BOXSET 套裝，現場限量100套，以及第22期限定版第二批，要知道首批於上市當日就已經即時沽清，今次同樣限量100本，《鬼滅》旋風就係咁瘋狂。

當然仲有壓倒《鬼滅》成為日本百大漫畫之首嘅《海賊王》會同大家見面，所以動漫節取消又點? 轉場咪得囉！