相信有返咁上下「影齡」嘅朋友，應該都睇過經典荒島求生愛情片《青青珊瑚島》（The Blue Lagoon），當年女主角Brooke Shields嗰種不食人間煙火嘅氣質，成為唔少男士夢寐以求嘅女神，直到依家都好難搵到第二個女星可以超越。而劇中男主角、現年60歲嘅Christopher Atkins，早排接受傳媒訪問時就透露自己搵緊女朋友，並希望對方能夠同佢「一日兩次」。

（圖片截自：instagram@christopheratkins1）

Christopher Atkins自從2007年離婚後，就一直單身多年。最近被外媒pagesix問到鍾意咩類型嘅女人嗰陣，佢就大方表示自己性欲非常強，希望可以搵到一個能夠同佢一日大戰兩次嘅對象。不過，佢就話如果拍得耐咗，頻率可能跌至一日得一次。以60歲嚟講，確實相當勇猛，唔知係因為基因唔同，定抑或佢靠外力輔助呢？

1980年上映嘅《青青珊瑚島》，故事講述一對年幼男女流落荒島，喺無大人照顧下成長。隨著踏入青春期二人漸生情愫，初嘗禁果，最終誕下小孩。由於當時女主角Brooke Shields未成年，同時劇中又有多個裸露鏡頭及情慾場面，所以引起唔少爭議，不過最終都無阻套戲大賣。