相信大部份人都鍾意聽歌，最舒服莫過於攤喺梳化聽住心儀嘅歌曲，奈何唔係咁多人屋企放得落大大部嘅落地/書架式喇叭，必須喺尺寸同音質之間作出取捨。今次IKEA就聯乘美國智能音響品牌SONOS向「高空」發展，推出既係音響又係傢俬嘅畫框式Wi-Fi喇叭。

有留意開IKEA嘅朋友都唔難發現佢哋近年聯乘SONOS推出「SYMFONISK」家居音響系列，主打將喇叭融入各種傢俬，繼「座檯燈Wi-Fi喇叭」以及「Wi-Fi書架喇叭」之後，今次再推超薄新作「畫框式Wi-Fi喇叭（Picture frame with wifi speaker）」，可以就咁放喺枱上面，又可以掛喺牆上，美觀得嚟又兼具喇叭功能。

據官方說明，呢款喇叭由兩個單體組成，分別負責高音及低音，而高音單體更配置聲波導管（Waveguide）能夠有效咁將聲音傳送到每一個角落，創造出更寬廣嘅音場。同過往嘅聯乘產品一樣，今次呢款喇叭可以同其他SYMFONISK系列產品串聯同時播放，並支援 AirPlay 2及Spotify Connect等技術，亦可以用兩個畫框喇叭組成立體聲音響。

僅有5cm嘅機身背後有個凹槽用嚟收埋條長3.5m嘅電源線，用家可以任意從其中一邊拉出，擁有相當大嘅擺放自由度，而機身上亦有播放/暫停及加減音量三個按鍵，提供即時音樂操作。呢款喇叭有黑色同白色兩款配色選擇，至於表面嗰幅「畫」就暫時未喺官網見到其他款式，或者日後會推出其他花款，售價為US$199美元（約$1544港幣），7月15日起於美國IKEA網站正式發售。

資料來源：IKEA