雖然Google自家硬件產品深受唔少粉絲歡迎，但佢哋一直以嚟主要透過官網同其他零售商銷售，極其量都係開下快閃店，從未有過一間實體門市。早前Google就終於宣布喺紐約曼哈頓區設立全球首間實體門市「Google Store Chelsea」，提供Pixel、Nest、Fitbit等多款產品販賣及技術支援服務。隨住新店即將開幕，近日外媒The Verge記者就帶大家先睹為快，一探究竟。

Google Store Chelsea由Google紐約辦公室部份空間改建而成，所以樓上就係Google辦公室，附近有昔名景點Chelsea Market。整體裝修風格都走環保簡約風，更獲得美國綠色建築委員會頒發白金認證，地板由回收膠樽製作而成，同時採用大量自然光及環保燈泡照明。

店內會展示Pixel手機、Nest智能喇叭、Fitbit智能手穿帶設置等多款產品，亦有Google串流遊戲服務Stadia展示廳，當然唔少得有各式各樣嘅配件銷售。除此之外，店內設有休憩及互動空間，可以畀消費者坐低慢慢體驗各種產品，各位用家亦可以向店員尋求技術支援。

由於疫情問題，Google強調門市會遵循政府防疫政策，客人進店必需配戴口罩，清潔雙手等等，而店內亦會嚴守社交距離原則，並一日清N次。暫時未知Google會唔會喺其他地方再設立門市，但今次確實係Google一個程里碑。

資料來源：The Verge