法國時尚品牌Louis Vuitton，繼先前推出嘅無線耳機Horizon Earphones、智能腕錶Tambour Horizon之後，再次展示其涉足科技產品界決心，以前衛美學風格設計出一款睇落似飛碟、又似陀螺嘅便攜式無線音響「Horizo​​n Light Up」。

官方表示，今次產品設計靈感源自Toupie手袋，結合金屬同名貴皮革而成，能夠為家居添綴別具特色嘅品牌標誌，旨在將品牌嘅「傳統與創新精神，與奪目視覺效果、卓越音色與嶄新科技完美融合」。

純粹以外型嚟講嘅話，毫無疑問佢哋今次真係夠晒奪目同創新，不過話晒係一個音響，個餡都好重要嘅。據了解，「Horizo​​n Light Up」能夠透過Wi-Fi及藍芽連接播放音樂，並支援 Apple AirPlay 2及QQ音樂嘅Qplay功能，而且可以用USB-C充電，續航力長達15小時。機內搭載一個3英寸低音喇叭以及2個0.75英寸高音喇叭，只要將個音響放喺跟機附送嘅底座上面，就能夠享受360度環迥音色。

「Horizo​​n Light Up」售價為$22,300港幣，現時開放訂購，預計8月內會發貨。