早前同大家報導過，動視暴雪（Activision Blizzard）因涉嫌職場性騷擾及性別歧視遭到加州政府起訴，指公司對女性員工薪酬待遇「大細超」 ，同時縱容男員工肆無忌憚騷擾女員工，繼而引起一連串罷工、玩家罷玩活動。隨住事情持續發酵，任職超過15年嘅暴雪娛樂（動視暴雪子公司）總裁J. Allen Brack突然宣布辭職，消息傳出唔夠一日，全球人力資源副總裁Jesse Meschuk亦宣布離職，睇嚟暴雪將會面臨更多人事變動。

喺暴雪娛樂任職超過15年嘅J. Allen Brack自2018年成為公司總裁，上任冇耐就因為「聰哥事件」而備受爭議。2019年嗰陣，《爐石戰記》選手「聰哥（Blitzchung）」因為比賽期間宣讀政治口號而遭禁賽，引起玩家強烈不滿，最終要公開道歉先平息民憤。據了解，J. Allen Brack卸任後將會由Jen Oneal和Mike Ybarra共同領導，兩人都有超過30年遊戲業經驗，當中Jen Oneal更負責過《暗黑破壞神2》重製版。

聰哥被禁賽得到大量玩家聲援。

就喺J. Allen Brack宣布辭職唔夠一日，暴雪娛樂全球人力資源副總裁Jesse Meschuk亦宣布辭職唔撈，仲要連Twitter帳號都刪埋。雖然Jesse Meschuk唔似得J. Allen Brack，喺訴訟文件入面被點名批評，但文中就多次提及HR部門有份助長惡劣職場文化，話唔定係因為咁而急急腳辭職。相信呢單嘢仲有排燒，唔知暴雪可以點樣重拾玩家及職員嘅信心呢？