尋日內地官媒《經濟參考報》發表文章，痛斥網絡遊戲彷似「精神鴉片」，嚴重影響未成年人身心健康發展，並點名批評騰訊旗下遊戲《王者榮耀》。雖然有關文章已被下架，但同日騰訊就宣佈以《王者榮耀》為試點，推出「雙減、雙打、三提倡」七項防沉迷打機新措施，減少未成年人士在線時間，禁止12歲以下玩家課金。

所謂嘅「雙減、雙打、三提倡」，分別係減時長、減充值、打擊身份冒用（因為有小朋友用大人身份開設帳號躲過審查）、打擊作弊，同時倡議全面禁止12歲以下小學生打機、企業進一步強化遊戲防沉迷系統、深化研究游戲適齡評定及實施機制。

騰訊於官方微信號「鵝廠黑板報」宣布新防沉迷措施。

新措施將會規定未成年用戶平日只可以玩1個鐘《王者榮耀》，假日則為2個鐘，並禁止12歲以下小學生課金，同時會將原本嘅「零點巡查」系統升級成「全天巡查」，嚴厲打擊未成年人冒充成年人打機情況。（「零點巡查」簡單嚟講就係夜晚打太耐機嗰陣，遊戲會透過臉部辨識技術Check下玩家係咪成年，詳情可參考以往報導。）