由於日本疫情持續，唔少父母都唔敢帶初生BB回鄉探望親朋戚友，最近有米鋪就忽發奇想推出「米袋BB」服務，按照BB真實體重將等重嘅米包裝成精美公仔，並且貼上彩色大頭相，等親友收到公仔嗰陣可以體驗一下BB嘅重量。

（圖片截自：The Guardian）

據The Guardian報導，「米袋BB」有多款設計，有純粹得個袋嘅，亦都有包住毛氈嘅款式，可以按客人需求而更改，價錢方面就取決於重量，大約每克1日元，以一個3.5kg嘅BB為例就需要約3,500日元（約$247港幣）。米鋪老闆就表示：「我14年前已經有呢個諗法，當年阿仔出世嗰陣，我喺度諗有咩方法同住得遠嘅親戚分享喜悅，於事就著手製作同BB一樣重量及形狀嘅米袋，等親戚收到可以感受一下新生嬰兒嘅可愛。

隨住訂單不斷增加，生意蒸蒸日上，米鋪老闆就擴大產品線，推出以婚禮為主題嘅慶祝米袋，等新娘同新郎用自己童年照相製成「米袋BB」，再送畀父母答謝多年養育之恩。據了解，目前婚禮米袋比初生BB米袋仲暢銷，唔知呢件產品又觸唔觸動到你呢？