呢個年代個個都講環保，唔知鍾意砌高達嘅你又有無諗過呢個問題? 就係你砌一部高達，周邊有唔少膠框等配件需要廢棄。不過黎緊可能唔使擔心啦，因為BANDAI方面今年4月1號啟動嘅「高達回收計畫」，將可以回收高達廢棄嘅零件框，以化學技術再生成其他模型。

按BANDAI方面給出嘅數字，高達由1980至今年3月，一共有4500種高品，並已經賣出超過7億1400萬份。亦即係話製造嘅廢膠亦多不勝數，所以於環保嘅大前提下，BANDAI都必須給出方法去減少浪費。

因此「高達回收計畫」便應運而生，計劃啟動初期於190間BANDAI遊樂中心設置回收箱，然後計劃於2022年將收番黎嘅零件以最先進嘅化學技術進行再生。

而今次計劃BANDAI預計回收10噸嘅零件，並會進行第一次再生實驗，之後就會以每年500噸為目標回收。而進行再生嘅零件，將會被製作為不同東西，其中包括玩具、新零件或其他環保產品，絕對係對地球嘅一大好消息。