英國神秘藝術家Banksy嘅作品近年不斷受追捧，其拍賣價格亦屢創新高，其中Banksy最著名作品之一嘅「自碎畫」《Love is in the Bin》亦即將重新拍賣，預計拍賣價將會升值4-6倍，即大約為400-600萬美金。而喺佢搵到新買家之前，《Love is in the Bin》就展開全球巡迴展出，其中本週末就輪到香港啦。

《Love is in the Bin》沿自Banksy於2002嘅塗鴉作品《Girl with Balloon》，最初出現於英國倫敦滑鐵盧橋，描繪一個黑白色小女孩目送鮮紅氣球飛走嘅畫面，帶出對在困難時期中對未來的期望。後來Banksy亦多次就不同國際人道議題將其改版。

而其中一幅紙繪版連畫框就於2018年登上蘇富比拍賣會，當拍賣官敲槌確定過百萬美金拍賣價嘅同時，被藏於畫框內嘅碎紙機隨即啟動，將畫作大半碎成紙條並懸於畫框之外。後來Banksy指該作品已經成為新作《Love is in the Bin》。

《Love is in the Bin》誕生一刻

《Love is in the Bin》後來被一位歐洲收藏家以140萬美元投得，自2019年長期借出予千德國史特加國立美術館。早前蘇富比就公佈《Love is in the Bin》會於10月14日於倫敦再次拍賣，拍賣之前將作世界巡迴展出，第二站就係香港。《Love is in the Bin》巡迴展出香港站將於9月10日至12日，於金鐘太古廣場1座5樓舉行。屆時大家就可以親眼睇到呢幅充滿話題性，而且預計身價超過3000萬嘅名作。