現年28歲嘅俄裔加藉程式員Vitalik Buterin (又稱V神) 乃係著名加密貨幣以太幣 (ETH) 嘅聯合創始人之一，亦憑11億美元資產成為最年輕加密貨幣億萬富翁之一，乃係幣圈中嘅知名人物。但近日佢就因為喺Twitter上多次發佈撐烏反俄嘅訊息，而被小粉紅用中文鬧佢「漢奸」，估唔到V神直接用中文大巴大巴車埋去！

Vitalik Buterin

圖片：Wikipediia

你不是俄罗斯人吗？你这个汉奸，难道普京对对你有过很惨的经历？

— dogecoin faith (@ioveamg1) March 9, 2022

自從俄羅斯入侵烏克蘭起，V神就喺Twitter多次發佈或轉推撐烏反俄 (準確啲係反普京) 嘅訊息，當中包括募資捐款畀烏克蘭、轉載戰爭消息、呼籲歐洲大學接收因反戰而被踢出校嘅俄國大學生等，結果就惹來一名名為「Dogecoin Faith」、使用簡體中文嘅網民辱罵「你不是俄羅斯人嗎？你這個漢奸，難道普京對對你有過很慘的經歷？」(文青注：我冇打錯字) 再睇睇Dogecoin Faith嘅Twitter內容，全部都係針對香港以及台灣嘅仇恨言論，可以確定佢就係一名小粉紅。

说一个国家的人必须支持自己国家的政府并不是爱国，而是一种奴隶制。真正的爱国有时候需要对抗自己国家发出的邪恶，因为这样才能帮自己国家变得更美

— vitalik.eth (@VitalikButerin) March 9, 2022

先唔好講對住一個俄裔加籍嘅外國人，用簡體中文鬧人哋「漢」奸有幾咁好笑，更好笑嘅係V神竟然用簡體中文發文回應：「說一個國家的人必須支持自己國家的政府並不是愛國，而是一種奴隸制。真正的愛國有時候需要對抗自己國家發出的邪惡，因為這樣才能幫自己的國家變得更美」句野仲通順過小粉紅啲中文。V神嘅發文亦引來超過2.3萬讚好、1,800個留言。值得一提嘅係，留言中有唔少人用簡體中文留言支持V神言論，甚至有人高呼「政府不能只有一黨獨裁壟斷，否則經常會犯錯」。