現時大部份嘅遊戲或多或少都有網上連機功能，等大家可以與來自世界不同地方嘅玩家對戰或合作，增加遊玩體驗。不過中國遊戲巨頭騰訊日前就宣佈，旗下VPN服務 (中國稱為「加速器」)將於5月31日改組，往後「只支援國內遊戲」，導致中國玩家們一陣怨聲載道，作為「牆外」玩家嘅大家又點睇呢？

大家須知中國被「網絡長城」包圍，玩家要連接其他國家伺服器，又或用Steam (唔係中國版嘅「蒸氣平台」)、Epic等外國平台嘅話就要透過VPN翻牆。而騰訊上週發表公告，指「因業務運營策略調整，2022年5月31日起『騰訊網遊加速器』將升級為『騰訊遊戲管家』」，而新舊版最大分別就係「產品升級後，將僅支持國服遊戲加速」。換言之即係失去翻牆能力。

圖片：新浪新聞

消息一出，中國玩家們紛紛吐糟「國服還要你加速？」、「那要你何用」、「國產3A時代到來」，亦有人猜測「大的要來了」、「閉關鎖國」、「文化阻斷」。但值得留意嘅係，中國國內並非只有騰訊一個「加速器」，而睇中國玩家留言，騰訊加速器本身嘅表現似乎都唔算理想，換言之如果中國真係想將玩家們留在牆內，就要再努力啲啦。

資料來源：新浪新聞