近年「漫畫改編真人版電影」越黎越常見，但質素呢……頂到盡都只能講係「好壞參半」。而早前漫畫《黃金神威》宣佈會拍真人版電影，又再一次引起網民對於「漫改真人電影」嘅討論 (主要係反對)，而日本媒體《ABEMA》就分析咗網民唔鍾意漫改真人電影嘅原因。

2009年嘅《Dragonball Evolution》應該係史上評價最差嘅漫畫改編作品，沒有之一

ABEMA於節目「ABEMA Prime」上針對《黃金神威》真人電影，引述正反雙方網民意見。支持真人版電影嘅人認為，能夠展現出原作嘅世界觀會係好事，但反對者就正正認為真人電影化後，無論世界觀、人物設定都一定唔會跟足原作，加上選角問題、篇幅有限而令劇情以至結局都要大幅度更改，所以真人電影就通常都唔好睇。特別係《黃》中，北海道土著阿依努族佔一個極重要地位，原作中獵食海豹、鯨魚等情節，出於商業考慮好可能亦會刪除，結果就變成一部平平無奇嘅商業化電影。

圖片：ABEMA

以上都只係講緊「漫改真人電影」嘅通病，而當中其實仲有個更「惡名昭彰」嘅分類叫「荷里活漫改真人電影」。由荷里活主導漫改真人電影，當然會有更多資金，特效亦可能更好，但同時世界觀、選角等問題亦更加嚴重——自己去搵《龍珠》真人版黎睇就知。所以動漫迷目前幾乎係一致反對「荷里活漫改真人電影」。ABEMA引述一個於去年4至5月做嘅網上調查，希望搵到「網民最希望荷里活真人化嘅漫畫作品」，結果雖然《鬼滅之刃》、《進擊的巨人》、《咒術迴戰》、《NARUTO》、《SLAM DUNK》、《Hunter X Hunter》等作品通通上榜，但就算係排第二嘅《鬼滅》都只有60票，而排第一嘅就係有456票嘅「冇」——即係唔好拍就係最好嘅。