雖然「富奸」長年休刊嘅惡習深受漫畫迷所恨，但無可否認嘅《Hunter X Hunter》的確係一部非常好睇而且受歡迎嘅作品，受歡迎到「富奸」都未話重新連載，只係開咗個Twitter更新原稿進度就已經令漫畫迷面非常興奮，三日內就將「富奸」推到成為Twitter上最多人Follow嘅日本漫畫家，更成為日本新聞熱話。但正正就係因為《Hunter》登上新聞，結果令到某啲日本網民覺得自己真係老啦…

電車内で学生たちが「『HUNTER×HUNTER』とかいう読んだこともない漫画が「ジャンプ」に載るらしい」って話してて、今の子たちからしたらそりゃそうだよなって思った。

— ふじま (@fujima32) June 7, 2022

卻說日本網民「ふじま@fujima32」日前於Twitter發文，話佢係電車內聽到兩個學生討論《Hunter X Hunter》嘅消息，但佢哋就唔係講緊《Hunter》終於再連載好興奮，亦唔係討論古拿比加可唔可以落船，而係話：「《Hunter X Hunter》，呢部我未聽過嘅漫畫，好似會喺《Jump》上面開始連載。」令推主驚覺年輕一代真係未聽過《Hunter X Hunter》嘅大名。

推文一出就引起日本網民熱烈討論，有人感嘆時代改變；有人留言話自己買咗5年《Jump》，但冇印象見過《Hunter X Hunter》嘅主角們；亦有人提出當年《BASTARD!! －暗黑破壞神－》其實都係同一待遇。亦有人理性分析，指《Hunter X Hunter》上一次漫畫連載已經係2018年，動畫更加係2014年嘅事，近年先開始睇漫畫嘅年輕人冇聽過《Hunter X Hunter》似乎亦情有可原。

另外有一個搞笑留言指，自己當年係為咗睇《奇英拉蟻篇》所以先開始買《Jump》黎睇，因為佢想知道點解「塗鴉」都能夠於《Jump》上連載，《Jump》嘅編輯們仲要力推。