今屆世界杯中，日本隊雖然未能於再進一步晉身八強，但小組賽中先後反勝德國及西班牙，最後以小組首名出線，表現依然非常亮眼。不過要講到今屆世界杯中嘅「日本最大贏家」，好可能就係講談社，事關佢哋旗下嘅足球漫畫《BLUE LOCK》，借住世界杯熱潮而令銷量急升，甚至創下兩個星期賣出200萬本嘅驚人成績。

《BLUE LOCK (中譯：藍色監獄)》為金城宗幸原作、野村優介作畫，於《週刊少年Magazine》上連載嘅足球漫畫。故事講述日本於2018年世界杯16強出局後，有感於「日本除了組織能力都是二流，唯有劃時代的前鋒能夠讓日本足球成為世界第一」而「最自我中心的人，才能成為世界第一前鋒」，於是集合300名18歲以下嘅年輕前鋒，於「藍色監獄」中進行閉門淘汰訓練，最後選出一名「最強前鋒」嘅故事。作品亦於今年10月動畫化。

據最新一期《週刊少年Magazine》指出，雖然《BLUE LOCK》動畫嘅播映時間，擺明就係借世界杯嘅熱度，但隨住日本隊於現實中嘅成績超乎想像，網民對於《BLUE LOCK》嘅討論亦超出預計，連帶單行本銷量急速上升，令總銷量突破1500萬本。當中有200萬本更係來自11月28日起到本週嘅兩個星期內，成績好到講談社自己都覺得驚訝。所以話《BLUE LOCK》及講談社係今屆世界杯最大贏家，可能都唔算誇張。

資料來源：Livedoor News