現年60歲嘅Tom Cruise為咗呢一幕，足足超過13,000次電單車飛躍、500次跳傘，敬業精神確實令人佩服！

因疫情影響而延期多次嘅《Mission：Impossible 7（職業特工隊：死亡清算上集）》將於明年7月正式上映，年已60嘅Tom Cruise繼續親身上陣挑戰各種「不可能」，上演街頭飛車、車頂肉搏、懸崖飛車跳傘等驚險戲碼。

最近官方就率先公開幕後製作花絮，揭示Tom Cruise駕駛電單車高速飛越懸崖跳傘特技祕辛。其中特技統籌Wade Eastwood表示，Tom Cruise花費近一年時間接受定點跳傘訓練及各種跳傘技巧，總共跳咗超過500次傘，變成一部專業嘅「跳傘機器」 ，教練亦大讚Tom Cruise犀利，啲動作教一次就學識，而且空間意識很強，係佢見過感知力最強嘅人。

另外，拍攝團隊亦特別搭建一條電單車跑道及跳台，畀Tom Cruise訓練飛車，並用上各種科技監測風向，電單車速度、飛行軌跡及落點，然後不斷修正動作，確保拍攝時萬無一失。結果正式拍攝當日，Tom Cruise第一個take就成功，但追求完美嘅佢，最後總共拍咗6個take。製作團隊亦不禁讚嘆：「電影史上最壯觀特技場面！」