最近日媒《よろず〜》以「每天玩10小時遊戲的男生才好」為題，表示愈來愈多單身女士鍾意同宅男拍拖甚至結婚，並訪問一位化名為森本みやこ嘅28歲女士，分享與宅男交往及結婚嘅過程。

森本小姐表示，起初佢都係鍾意啲外向嘅男仔，先後同過Rapper、髮型師、業餘運動員等人拍拖，從來都冇諗過會同宅宅交往。佢同老公喺而家做緊嘅公司相識，最初對佢冇咩感覺，直到某日大家傾開偈，佢敞開心扉表示自己好鍾意打機，放假時仲會玩足全日，從嗰時起就漸漸對佢產生興趣，並開始留意佢，發現佢好真誠、從來都唔會掩飾自己係宅宅嘅身份，經常講出「我今日要返屋企打機，所以要準時收工」、「我要打機，所以要請假」之類嘅說話。其後兩人愈傾愈親密，最後仲拍埋拖。

森本小姐認為宅男好在唔會裝模作樣，大家能夠冇壓力、輕鬆自在咁相處，例如食飯時我地都係直接AA制，之不過佢就唔係好識照顧女仔。另外，宅男對名錶、名車、潮鞋都冇興趣，所以唔使擔心婚後支出，同時亦係我決定嫁俾佢嘅一大理由。（我諗佢應該唔知ACG周邊可以賣到幾貴...）

為求證宅男係咪愈嚟愈搶手，《よろず〜》亦訪問咗婚姻介紹龍頭公司「Dear Bride Tokyo」，公司代表戸坂敦表示婚姻市場上確實愈嚟愈多內向型男士，但係咪非常受歡迎就唔能夠一概而論，事關依然有唔少女士鍾意外向嘅男士。婚姻生活關鍵在於彼此有冇共同興趣同價值觀，如果有更多女士理解及鍾意宅宅嘅心態，咁宅男自然會愈嚟愈搶手。