日本出生率長期低落、人口老化問題嚴重呢啲，基本上都唔可以稱之為「新」聞，但實際上個問題又有幾嚴重？日本國立社會保障．人口問題研究所近日就公佈咗5年一次嘅「國勢調查」，結果發現按目前趨勢，幾十年內日本人口就會大跌三成！

圖片：Pakutaso

據「國勢調查」顯示，按目前嘅生育率以及死亡率去計算，去到2070年時，日本總人口為8700萬人左右，比起2020年嘅1億2615萬人大跌三成。其中65歲以上老年人口比例，更會由2022年嘅29.1%，增長到38.7%。2070年日本出生率亦由早前嘅1.44，調低至1.36，即屆時每名婦女平均只會生育1.36個小朋友。

另一個值得關注嘅數字，就係按目前日本嘅移民數字推算，去到2070年長居日本嘅外國人比例將會增至10.1%，比起2020年嘅2.2%翻咗幾乎5倍。同時亦多得外國人口增長，以及日本國民預期壽命延長，日本總人口跌破1億人嘅時間點被延後三年至2056年。而如果只計日本國民，人口數跌穿1億大關嘅時間點就係2048年。

圖片：Pakutaso

更值得一提嘅係，早前聯合國人口基金公佈「世界人口狀況」報告，當中香港嘅出生率僅為0.8，乃係全球最低，而同一份報告中嘅日本出生率就有1.3。換言之，香港面對嘅人口問題，可能比起日本更為嚴重。

資料來源：NTV、RFA