CAPCOM喺今早舉行嘅「State of Play」發布會公開《Monster Hunter: Wilds》首部預告，展示遊戲全新生態氣候系統、魔物、座騎，以及戰鬥動作，預計2025年在PlayStation 5、Xbox Series X/S、PC等多個平台推出。

從預告可見，玩家今次將會聯同調查隊隊員，奉命前往由沙漠、草原及岩石組成嘅封禁之地「天塹沙原」進行考察，面對不斷變化嘅嚴酷環境以及成群結隊嘅全新魔物，當中包括擁有強韌身軀嘅「闢獸」、懂得利用黏性唾液將礦石附著喺前腿增加力量嘅「纏蛙」、透過背角將雷擊引導至地面嘅「雷甲龍」等等。

除此之外，玩家於本集將獲得全新座騎「鷺鷹龍」，從地圖指定地點後，佢就會根據氣味自動帶獵人前往目的地，移動過程中可以使用部分道具及投射器，亦能夠恢復體力及銳利度或進行採集，並配備一個「武器袋」，可供玩家存放第二把武器隨意切換。

資料來源：monsterhunterwilds