由David Leitch執導、Ryan Gosling及Emily Blunt主演，以特技人為主角嘅電影《The Fall Guy》（特技狂人）除咗為觀眾帶來目不暇給嘅特技場面之外，亦帶起咗業界對特技人是否缺乏尊重與表揚嘅討論，而呢個討論，似乎會有個正面嘅結果。事關據外媒報導，奧斯卡近日的確研究緊能否增設專為特技人而設嘅新獎項。

圖片：《The Fall Guy》

《Empire》早前於康城影展中，與奧斯卡主辦方「電影藝術與科學學院」（AMPAS，簡稱學院）嘅高層們做咗個訪問，並談論到未來奧斯卡頒獎禮及獎項嘅改革。當中學院CEO Bill Kramer就正面回應增設最佳特技人獎一事：「我哋正同會員中嘅特技人社群討論緊呢件事。我哋之前亦決定增設兩年後開始頒嘅選角導演（Casting Director）獎，所以我哋一直都願意去討論。」

而學院主席Janet Yang亦補充：「學院其實似係一隻有生命、會呼吸的生物。我哋聆聽會員，而如果有強烈嘅支持，又有完整嘅機制去推動件事，而大家又有興趣…試鏡個獎就係咁出現。過去我哋亦曾經增設其他獎項，所以我哋係會進化，跟隨業界改變而進化。」

資料來源：Empire