拜神祭祖呢啲東方傳統儀式於過去一段非常長嘅時間都冇任何重大改變——傳統嘛，定義上就係唔多會變嘅。但如果代入先人嘅角度，年年都咁嘅祭品咁嘅香，又會唔會覺得悶呢？日本有位電機工程師就決定搞搞新意思，整出一組「電競RGB風LED線香」，瞬間令神龕潮流感暴升！

卻說本身係一位程式員再加有電工牌嘅「Steve Kasuya （@SteveKasuya2）」，早前於日本盂蘭盆節前夕，於個人X（Twitter）發表咗一組「「電競RGB風LED線香」。佢將日本市面上已經有、外表與傳統線香香爐相似嘅LED線香改裝，先將香爐同線香本體塗成黑色，原本模仿線香燃燒嘅LED燈，亦被佢換成RGB風嘅彩色閃燈，而且仲閃得非常快，莫名地增加唔少觀樂氣氛。

「Steve Kasuya」呢項結合傳統儀式與現代科技嘅作品深受日本網讚賞，到撰文之時該帖文已經有超過170萬次觀看、3萬個讚好。留言處亦有大量網民讚揚佢嘅作品「又靚又環保又防火」、「爺爺回來時不會迷路了」；另外有人提出建議，希望能夠將線香嘅發光部份換成火炎形狀，認為會更加像真。不過亦有想法較為傳統嘅網民提出反對，例如有人表示佛祖鍾意向上升起嘅香煙及坎煙，所以建議大家都係用返真香。唔知各位又點睇呢？