最近外媒《Deadline》公布2024年最賺錢及最蝕錢荷里活電影排名，結果由迪士尼出品嘅《玩轉腦朋友2》、《魔海奇緣2》及《死侍與狼人》包攬前三名，而最蝕錢嘅電影就係口碑票房雙雙仆直嘅《小丑：雙瘋》，淨虧損達1.44億美元。

最賺錢電影排名榜方面，迪士尼繼2023年製作出多部票房炸彈後，在去年重振旗鼓、狀態大勇，包辦咗十大最賺錢電影頭三名同第九名，4部作品合共淨賺16.4億美元。而環球影業就憑住著名動畫續集《壞蛋獎門人4》、《功夫熊貓4》，以及經典音樂劇改編嘅《魔法壞女巫》奪得第四、五、八名三個席位。其餘嘅Sony影業、華納兄弟及派拉蒙等大廠就各有一部電影上榜，平分秋色。

值得一提嘅係，榜單入面有一半都係動畫電影，而且大部份電影都係續集，某程度上反映出當今電影市場趨勢，觀眾鍾意睇大IP嘅續作及老少咸宜嘅動畫片，所以唔怪得各大片商咁鍾意不斷從現有IP開發續集，事關咁做係最低風險且高回報。

2024年最賺錢荷里活電影Top10：

1.《玩轉腦朋友2》：淨利潤 6.50億美元（迪士尼 / Pixar）

2.《魔海奇緣2》：淨利潤 4.15億美元（迪士尼）

3.《死侍與狼人》：淨利潤 4.00億美元（迪士尼 / 漫威影業）

4.《壞蛋獎門人4》：淨利潤 3.70億美元（環球 / 照明娛樂）

5.《魔法壞女巫》：淨利潤 2.30億美元（環球影業）

6.《到我們為止》：淨利潤 2.07億美元（Sony影業）

7.《沙丘：第二部》：淨利潤 1.843億美元（華納兄弟 / 傳奇影業）

8.《功夫熊貓4》：淨利潤 1.78億美元（環球 / 夢工廠）

9.《獅子王：木法沙》：淨利潤 1.75億美元（迪士尼）

10.《超音鼠大電影3》：淨利潤 1.236億美元（派拉蒙）

至於最蝕錢電影排名榜方面，首兩名都由華納兄弟包辦，包括因為風格同首集大相逕庭而被鬧爆嘅《小丑：雙瘋》，以及叫好但不叫座嘅《芙莉歐莎》。緊隨其後分別係遊戲改編電影《邊緣禁地》、金像導演Francis Ford Coppola自掏腰包開拍嘅《超級大都會》，以及Sony Marvel宇宙嘅《狂獸獵人格力文》。

2024年最蝕錢荷里活電影Top5：

1.《小丑：雙瘋》：淨虧損 1.44億美元（華納兄弟）

2.《芙莉歐莎：末日先鋒傳說》：淨虧損 1.19億美元（華納兄弟）

3.《邊緣禁地》：淨虧損 8,000萬美元（獅門影業）

4.《超級大都會》：淨虧損 7,550萬美元（獅門影業）

5.《狂獸獵人格力文》：淨虧損 7,100萬美元（Sony影業）