由Rockstar開發嘅《GTA 6》早前宣布延期至明年5月26日發售，引起全球機迷一遍哀嚎。為表誠意，官方終於喺噚晚公開第二部預告，並同步揭曉雙主角以及另外6位角色背景資料，繼續吊大家癮！

從預告可以見到，男主角Jason Duval正式登場，並揸車前往監獄迎接女主角Lucia Caminos出獄，兩人聯手組成「雌雄大盜」進行一連串犯罪活動，街頭飛車、搶劫、槍戰、躲避直昇機追捕等刺激畫面樣樣齊。

除此之外，Rockstar亦喺官網一併公開其他6位主要角色嘅背景資料，讓玩家們更了解遊戲全貌，包括男主角老死兼同事Cal Hampton；事業涵蓋房地產、脫衣舞俱樂部及錄音室嘅音樂人Boobie Ike；靠販毒維持生計、夢想闖入音樂界嘅Dre'Quan Priest；KOL兼Hip-Hop組合Real Dimez；經驗老到嘅銀行搶匪Raul Bautista；以及走私販Brian Heder等等。