由Brad Pitt主演、《Top Gun: Marverick》導演Joseph Kosinski執導嘅F1賽賽車電影《F1》上週正式上映後，開畫票房數字亦陸續塵埃落定。從結果而言，《F1》可以話係超乎想像地成功，唔單止將會成為Brad Pitt從影以來最高嘅開畫票房，同時亦係近年最成功嘅賽車電影。更重要嘅係，《F1》好可能係Apple Studio到目前為止最成功嘅電影，為其打下強心針。

據《The Hollywood Reporter》等外媒報導，《F1》上週五於美國正式上映之後，首日（週五）北美票房就已經高達2500萬美金，當中單單係優先場就已經貢獻1000萬。預計整個開畫週末嘅北美票房可達5500至5800萬美金。而全球票房方面，於Warner Bros.嘅協助下亦將達到8500萬美金，換言之其開畫週末總票房最少將有1.4億，將超越2013年嘅《World War Z》（地球末日戰）嘅1.12億，成為Brad Pitt從影以來最高開畫票房。

相比起近年嘅其他賽車電影，《F1》更是異類。2013年上映，由Chris Hemsworth主演嘅另一部F1主題電影《Rush》（一級雙雄）總票房僅為9000萬美金左右；由Christian Bale同Matt Damon主演嘅2019年電影《Ford v Ferrari》北美開畫票房亦僅為3150萬美金左右，總票房為2.25億美金。

《F1》嘅票房成功可謂佔盡天時地利人和。天時方面，近年F1成功透過與Netflix合作嘅紀錄片《Drive to Survive》打開年輕人市場，擴大全球F1賽車嘅觀眾基數嘅同時，亦吸引到更多觀眾對《F1》電影有興趣。而且美國乃係F1賽車重點開發嘅市場，先後加入拉斯維加斯站以及邁亞密站，進一步提高F1於美國嘅人氣。從電影票房黎睇，其成果非常超卓。

地利方面，由於同期冇其他大作嘅關係，《F1》能佔據大量IMAX或其他大螢幕版本影院，票價提升自然亦有助票房數字。至於人和，導演Joseph Kosinsk及編劇Ehren Kruger自《Top Gun: Maverick》後再次合作，創作出高質素嘅電影，良好嘅口碑及評價自然又吸引到更多人入場。

資料來源：The Hollywood Reporter