雖然無對外公開承認，但現年63歲嘅Tom Cruise與37歲嘅Ana de Armas戀得火熱就已經係人盡皆知，近日更有報導指二人即將拉埋天窗。不過比起二人結婚呢件事，更搶眼嘅係佢兩個打算「點樣結」，事關據報Tom Cruise就連結婚都要搞「不可能的任務」，要上太空或於深海結婚。

消息來源於美國小報《Radar Online》。據佢哋引述知情人士指，Tom Cruise與Ana de Armas之所以行埋，係因為二人都對呢類極限活動充滿熱情，所以要於婚禮上玩鋪大嘅似乎就好順理成章。知情人士亦指Tom Cruise對太空情有獨鍾，所以希望成為首對於太空行禮嘅夫婦；而深海似乎就係退而求其次嘅選項。另一選項就可能同高空跳傘有關，有可能係於跳落黎途中交換誓詞。反正就唔會係一般人諗到或做到嘅婚禮模式。

考慮到Tom Cruise近年嘅人設，佢打算整個「不可能的婚禮」出黎似乎都唔係咁難想像。但值得一提嘅係，到目前為此二人都未承認關係，甚至能夠證明佢哋兩個一齊最有力證據，都只係7月時佢哋被拍到拖住手去旅行，更惶論關係穩唔穩定、訂咗婚未諸如此類嘅問題。

資料來源：Radar Online