日本特攝劇《超級戰隊系列》歷史悠久，陪伴過好幾代人童年成長，亦捧紅過唔少演員。不過最近有報導指，由於受少子化影響，呢個走過半世紀嘅系列，將隨住現正播放嘅《No.1戰隊五獸者》完結後正式劃上句號。

據《產經新聞》引述知情人士報導，由於出生率下降，節目相關活動、周邊商品同改編電影帶來嘅收益不斷下滑，已經無法負擔龐大嘅製作成本，促使電視台在系列50周年之際結束呢部經典特攝作品。而且按照以往慣例，官方每年都會喺呢個時候申請新一季《超級戰隊》商標，但今年遲遲未有動靜，所以早前已經引起Fans議論紛紛：「下季戰隊呢？」不過，截至目前，東映同朝日電視台都未有正式回應，或者仲有轉機？

1975年《超級戰隊系列》首作《秘密戰隊五連者》

《超級戰隊系列》自1975年首播以嚟，幾乎每年都推出新作，至今累積多達49部作品，主題涵蓋動物、交通工具、恐龍、宇宙等多個題材，其變身器及機械人玩具更曾經係長期熱賣嘅產品，成為唔少人童年回憶。除此之外，《超級戰隊》同《幪面超人》一樣，都係唔少年輕演員嘅出道跳板，例如松坂桃李、山田裕貴、橫濱流星、玉山鐵二等人氣男星都係從呢個系列起家。