節日對於單身人士黎講素來都唔太「友善」，但外國約會網站嘅一個最新調查就發現，原來令單身人士最寂寞嘅節日唔係「Lonely Christmas」、亦唔係「街裏愛人一對對」嘅情人節，而係今日——名義上同「情人」完全無關嘅萬聖節。

圖片：ImageFX

而據《Dating.com》早前進行嘅一個調查訪問1000名單身人士後發現，有近八成受訪者表示曾於萬聖節當日感到寂寞，六成受訪者認為萬聖節係全年「情緒上最難過」嘅節日，有57%人認為萬聖節比起情人節更加難過，另外仲有一半人曾經於萬聖節當日遇上有一家大細上門「Trick or Treat」後自己一個人喺屋企喊。

為咗避免觸景傷情，有77%受訪者曾經扮自己當晚有約，但實際上只係返屋企自己一個過。但唔出街、唔開門亦唔一定係「安全」！因為有73%受訪者認為於社交媒體見到人哋慶祝萬聖節就已經夠難受。另外有62%受訪者表示自己極少向外人透露情緒，即使於節日感到空虛寂寞都依然強裝無事。

圖片：ImageFX

萬聖節殺傷力咁大嘅原因好可能同外國文化有關。與亞洲地方將萬聖節當係開Party嘅藉口唔同，外國萬聖節更似係一個家庭節日，全家人可能會一齊精心扮鬼，再去隔離鄰舍敲門拎糖果（Trick or Treat）；就算係未有小朋友嘅可能都會以情侶打扮出席親友聚會。咁單身人士見到自然就覺得自己「被世界遺棄很可怕」啦。

事實上現代人感到寂寞已經唔止係一個「兩性問題」，而係慢慢變成一個社會問題。例如紐約市政府早前進行嘅另一個研究就發現有超過一半紐約居民至少「有時感到寂寞」，並警告寂寞會影響睡眠、照顧自己嘅能力，甚至可能會導致焦慮、抑鬱乃至自殺傾向。

資料來源：New York Post