Netflix人氣劇集《Stranger Thing（怪奇物語）》等足3年半終於迎來最終章！一眾主角將再度集結，齊心協力誓要搵出並消滅大魔王Vecna，結束一切讓霍金斯小鎮回歸平靜。究竟結局會係點呢？今年11月正式揭曉！

《Stranger Thing》第5季兼最終季將延續上季劇情，即大魔王Vecna令Max陷入昏迷，顛倒世界嘅入侵令霍金斯小鎮滿目瘡痍。今次主角群終於重聚，眾志成城誓要搵出Vecna並將佢殺死。與此同時，政府將整個霍金斯小鎮封鎖列為軍事禁區，以追捕Eleven，迫使佢再次隱藏身份。隨住Vecna消失接近一年，一種熟悉嘅恐懼感捲土重來，眾人準備作出最後一戰。

預告片配上搖滾天團Queen經典名曲〈Who Wants to Live Forever〉嘅激昂旋律，揭示大反派Vecna再度回歸並企圖入侵現實世界，主角們嘅唯一目標正如Mike所講：「要搵到Vecna，徹底結束呢一切！」。不過今次戰鬥注定係一場硬仗，從片中可見怪獸Demogorgon從顛倒世界湧出，襲擊駐守霍金斯小鎮嘅士兵；Lucas更抱住仍然昏迷嘅Max，被困於醫院升降機內， 一隻Demo-dog正飛撲而至；Eleven同Hopper似乎會離開大夥行動，執行某項任務，而Eleven嘅超能力亦明顯再度進化。但最震撼嘅一幕，就喺片尾Vecna現身於一個滿地屍體嘅軍事基地，用超能力舉起失去意識嘅Will，並低聲講出：「William，你要再幫我一次...最後一次。」

第五季將分拆成三部份播出，第一輯（4集）將於11月27日播出、第二輯（3集）於12月26日播出，而最後一集大結局則在2026年1月1日播出，每輯上架日期均為香港時間上午9點，各位影迷敬請留意。