由Amazon Prime製作嘅《God of War》真人版劇集，喺去年秋季經歷創作班底大換血後，終於有新進展！目前劇集已正式展開選角工作，官方更提前宣布續訂第二季，可見對創作團隊充滿信心。

自從資深製作人Ronald D. Moore於去年秋季加盟，成為新任節目統籌、編劇及執行製作人，並對創作方向大改革後，呢部早於2022年宣布開發嘅真人版劇集終於全面加速。目前劇組已溫哥華展開前期製作及選角工作，同時邀請到FX人氣劇集《幕府將軍（Shōgun）》導演、艾美獎戲劇類片集最佳導演Frederick E. O. Toye負責執對前兩集，為全劇奠下基調。

據了解，《God of War》真人劇將改編自2018年原作遊戲《God of War（又叫戰神4／新戰神）》嘅「北歐神話篇」，講述Kratos同Atreus兩父子為履行亡妻／亡母遺願，踏上將其骨灰灑落九界最高峰嘅旅程。旅途中，Kratos嘗試教導兒子如何成為一個更好嘅神，而Atreus則努力令父親學識如何成為一個更好嘅人。