「路軌上的iPhone」俄羅斯本土製電車

文：MenClub 魏文青　　
POSTED ON 04 Aug 2015

上次同大家睇過日本九州嘅「幻之豪華列車」，再諗返起平日返工放工齊齊逼嘅地鐵，係咪突然間有啲傷感呢？不過事實通常都係好殘酷嘅。當你正諗住用「架咩豪華列車都唔係畀平民百姓坐架啦！」黎安慰自己嘅同時，俄羅斯就推出呢列稱之為「路軌上的iPhone」嘅電車。

由 Uraltransmash(俄羅斯科技及生產部「UralVagonZavod」轄下機構。都係嗰句，唔好問點讀)，以及試驗性設計部門「Atom」聯有研發嘅「Russian one(R1)」，外表睇黎似係科幻片先會出現嘅未來交通工具。設計師Alexei Maslov指設計「R1」嘅目的係要改變市民對於公共交通工具嘅印象，甚至為全世界嘅公共交通工具訂下新標準。

所以唔單止外表Cyber，車廂內亦內置WiFi、GPS、電子導航(小吐糟，行軌嘅車要導航？)等設施。全車設有可調節光亮度嘅LED燈，亦用上高清攝錄鏡頭代替一般嘅倒後鏡。為咗保障車內衛生，扶手用上抗黏菌銅物料，車廂內亦內置石英紫外線燈，可以於休息時間自己為車廂消毒。

最巴閉嘅就係成架車除咗緊急逃生門嘅開關，以及車廂之間嘅連接部件，其他都係俄羅斯本土技術同本土製造，而且仲完全符合國際工業標準。車廂內嘅座位可以因應行走路線更改，方便應對唔同情況。駕駛席向前突出嘅設計除咗有效增加視角，尤其係向下嘅視角，咁樣會有助減少電車下方嘅盲點，保障行人嘅安全。

再傷香港人心嘅係，一列R1造價只係需要100萬歐羅，即係大約850萬港元。反觀近年地鐵以中國製列車更換使用多年嘅英國製列車，首批112卡總共用咗11.2億，即係除開大約為1400萬一卡。我都知「電車」同「地鐵」有唔同，但見到人哋嗰架咁靚仔我就真係唔抵得咁囉！