圖片：express.co.uk

星期六英超早場有北倫敦打比熱剌主場對阿仙奴，兩隊因為聯賽排名旗鼓相當令呢場比賽充滿話題性，阿仙奴喺各項比賽已經三連敗，加上施治傷出大家都睇好熱刺可以贏波，熱刺反勝之餘一度領先，只係阿仙奴今場把握力唔錯由阿歷士山齊士入返球執返一分。本來只要是但一隊贏到就可以追近榜首李斯特城將差距收窄到兩分，不過和波就令到同日贏波嘅李斯特城將優勢拉開到6分，星期六邊個最開心？肯定係雲尼亞里。

圖片：截圖自whoscore

阿仙奴今場陣容都有幾大改動，除咗固有正常受傷而需要變動嘅位置之外，左閘傑比斯取代蒙尼爾，藍斯轉打右翼鋒以一月新收購嘅艾利尼取代原有位置，前鋒就用久傷復出嘅大帝韋碧克取代銀河唯一基奧特，今場阿仙奴敗北嘅位置就係中場位。而熱刺中前場嘅部署都好出色，艾歷臣、拉美拿同阿里三個不停交換位置，拎熱刺嘅攻勢千變萬化，防不勝防。

圖片：fourfourtwo

熱刺今場用全場緊迫戰術相當有效，阿仙奴無藍斯打原本位置控制節奏已經讓出半璧江山，呢個都係上半場奧斯爾同阿歷斯山齊士無啖好食嘅主因；熱刺用迪亞負責防務，丹比利負責派牌；迪亞今場了無貢獻阿仙奴應該係可以偷到雞，不過丹比利表現神勇打埋迪亞嗰份，交出97%成功傳球率同7次攔截，係熱刺可以成功壟斷比賽最大功臣。

圖片：eurosports

既然熱刺都壟斷比賽，點解阿仙奴仲可以上半場領先，其實阿仙奴上半場埋門機會相當少，而領先1-0嘅入球要讚韋碧克，佢喺左邊時無即時俾波有越位風險嘅藍斯，而家先俾喺右邊空晒嘅比拿連，比拿連有呢個空位都要多謝藍斯拉散熱刺防線，而藍斯後腳射呢球都相當有難度，所以都抵佢哋領先嘅，至於阿仙奴嘅第二球，基本上熱刺下半場嘅體力同集中力都開始不足，加上比拿連同阿歷斯山齊斯個人技術幫阿仙奴保返住個爭標希望。

圖片：express.co.uk

另外好值得講嘅就係阿仙奴二號門將奧斯賓拿，原來今場係佢今季第一次聯賽上陣。呢個哥倫比亞國門今場可以話救咗阿仙奴無數次，上半場如果無佢救咗拉美拿個必入波，阿仙奴有無士氣頂到藍斯入波都成問題。不過點解咁多神救，雲加都要買施治？奧斯賓拿本身基本功唔算好好，特別係佢嘅手勢，呢場波你見到佢好多時都接唔實個波，接唔實都算，撲出底線最多都係輸個角球，但佢好多時都係撲返去小禁區，如果熱刺有人捕呢啲位真係有排輸。如果佢一無狀態就大獲，無正選係有原因。

圖片：Goal.com

阿仙奴嘅惡打賽程已經行咗大半，唔想又爭前四就要好似山齊士咁講，球隊一定要保持飢餓感，而且唔可以再好似呢幾場咁打咁慢；至於熱刺，如果我係普捷天奴就會放棄歐霸盃全力打英超，今季列強一齊撻Q可以話係熱刺贏英超最佳時機，反正贏到歐霸盃都只係可以打歐聯，點解唔拎個下季未必再有機會贏嘅冠軍？

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/