圖片：uefa.com

拜仁慕尼黑今季創球會歷史連續四季贏到德甲冠軍，今屆德甲雖然贏得有啲險，不過呢個德甲最後都袋袋平安。拜仁方面好快手已經進行增兵工作，首先就係「傳曼聯」睇中好耐嘅FM妖人翼鋒拿度山齊士以3500萬鎊轉會；然後再喺死敵多蒙特再買前青訓曉姆士，曉姆士已經係拜仁繼利雲杜夫斯基同葛斯後第三位轉投拜仁嘅多蒙特球員。拜仁嘅德甲霸業仲有排玩。

圖片：Bleacherreport.com

曉姆斯今季同多蒙特得返一年約，好多球隊特別係英超嘅曼聯、利物浦都睇中佢好耐，所以到底呢位多蒙特隊長下季仲會唔會普蜜蜂戰衣都備受關注。上星期多蒙特就事先張揚曉姆斯屬意加盟拜仁，但就俾曉姆斯批評會方陷佢於不義，一個星期唔使就轉投拜仁，班多蒙特球迷同反拜仁球迷唔火滾就假。

圖片：FC Bayern Munchen on twitter

拜仁作風真係好鬼似我哋香港嘅大台，恃住有財力有壟斷優城就用錢打壓僭在對手，買晒競爭對手嘅主力返嚟，就算好似葛斯咁買嚟坐冷板都唔益你。有時我都會諗，可唔可以好似NBA咁，定個薪酬上限令啲球會實力差距細啲。但NBA又唔同足球，NBA唔使打好似歐聯咁嘅比賽，搞薪酬上限就會削弱球會喺歐洲賽嘅競爭力。可以做嘅只有分配電視轉播費上公平啲，又或者等拜仁自己PK囉，足球世界係咁無奈架啦，邊有咁多隊李斯特城呀。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。