隨住年月過去，好多往日事物、商鋪都會被人們拋棄、忘記、結業，再消息於歷史之中。而曾經係日本平民百姓必去嘅「錢湯 (公共浴場)」，近年就只係剩返老人家們會幫襯。有35年歷史嘅東京「黃金湯」就決定進行內部翻新，為浴場增添現代氣息，令錢湯文化能夠繼續延存。

圖片：schemata.jp

翻新設計由Schemata Architects操刀，並無對錢湯浴場空間作出任何改動，而係透過改變裝潢配備，再利用渦爐房、儲物房等空為錢湯加入現代氣息。例如接待處改為工業風酒吧，配外露混凝土牆及米白方形瓷磚，再換上玻璃大門，令玄關位置變得更為開揚明亮，擺脫陰暗殘舊嘅氛圍。亦加入桑那房及空氣浴池。

而分隔男女湯嘅牆亦刻意保留唔到頂嘅設計，令顧客 (大部份為街坊家庭) 即使分隔兩邊，感覺上都處於同一空間，甚至能夠對話及傳遞沐浴用品。而睇漫畫都會成日見到、錢湯經常有嘅富士山璧畫，就由《今日的貓村小姐》漫畫家星余里子小姐嘅簡約插圖取代，進一步淡化傳統浴場嘅老舊感。

圖片：schemata.jp

改建後嘅「黃金湯」既能保存老客人習慣嘅味道，亦能融入現代感以吸引年輕家庭，以延長錢湯嘅生命。比起香港常見，歷史古蹟都拆剩個門框嘅所謂「保育」，絕對係更好嘅選擇。

資料來源：schemata.jp