「貪財好色」意解︰「貪圖私利，喜好女色」，聽落好似好負面，但實屬人性，套用喺銷售之道亦不為過。唔好諗住有個「道」字就係咩大道理，老老竇竇，即使營銷有無限高深學問，講到尾，大家都係求財，如果唔係下下免費派畀你好冇？而「財」同「色」之間嘅關係，除咗同為人類所好外，唔少「財」都係靠「色」去獲得。嗱嗱嗱！唔係叫你要賣女求榮呀！而係市面上好多商品，都係利用人類「好色」嘅本性去引人注意。雖然唔多人公開講述，但無容置疑，Sex Appeal的確係廣告史上最常見嘅廣告手法，沒有之一（好似係）。

對於營銷，大家都充滿疑問，究竟點樣先會賺大錢？營銷品牌管理專才兼著名作家兼商業演講者徐緣就寫過唔少關於Marketing嘅書，今次介紹嘅《甜銷》一書，就少有地踩入「色」字禁域，講講Sex Appeal喺廣告界嘅歷史及分析運用手法，可謂破天荒嘅作品！

所謂《甜銷》，其實就係Sex Appeal。有人寫作情色廣告，亦有人寫作性感廣告，但徐緣認為此等譯法都不足以涵蓋Sex Appeal一詞，於是自創新詞，去解讀Sex Appeal嘅多樣性。

關於營銷，咁多嘢寫，點解選擇咁大膽同大家談談情說說性？望住官仔骨骨一臉正經嘅徐緣，不禁心諗︰唔通佢外表斯文，內裡……徐緣笑著解釋︰「其實之前我寫過幾本關於Marketing廣告介紹嘅書，後來見到唔少作者都寫相近題材嘅書，我就開始諗有冇偏鋒啲嘅題材可寫。雖然未必多人買，但我認為文化傳承上都需要存在。而Sex Appeal其實喺廣告形態上好常用，但始終較多禁忌，又尷尷尬尬，所以專書唔多。咁啱我又睇過美國廣告學教授Tom Reichert寫嘅《The Erotic History of Advertising》，佢專講美國Sex Appeal歷史，睇完我覺得好過癮，同時亦好若有所失，因為本書淨係提及美國例子，欠缺東方部分，所以我想寫本書將華文化Group埋入去。」

可能你以為Sex Appeal有個Sex字，實係講咸嘢，但根據Tom Reichert分析，Sex Appeal廣告唔一定同色情有關，可以係靚人靚相，又或者語帶相關嘅幽默笑話。喺香港呢個較為保守嘅城市，最為人熟悉嘅Sex Appeal廣告手法，都係請個靚女Sell吓化妝品護膚品，問到有冇再Deep啲、印象深刻啲嘅Case？徐緣都諗咗好耐︰「香港Sex Appeal都係護膚品嗰類，冇特別覺得邊個好……玩幽默嘅Sex Appeal香港又好少，冇咩特別好提，所以我都寫唔到咩香港好嘅（Sex Appeal）例子。」皆因香港播出街嘅事事都要過Sensor，就算網上平台都冇咩有趣例子，勉強要講，可能就係「杜蕾斯」一系列廣告︰「佢有個廣告係分12條短片，當中有12個女仔，然後影住個男仔如何FF呢12個女仔，入面有啲女仔好斯文，有啲好性感；有啲係學生，有啲係文青。咁呢啲性暗示嘅廣告喺香港都算有趣味。」不過呢啲性暗示橋段用喺Condom上都仲講得過，如果用喺其他商品上，就要搏一搏。

咁係咪得Sex或者Sexy Product例如成人玩具、內衣褲Blah Blah Blah先最Suit Sex Appeal廣告手法呢？未必～「其實Sex Appeal嘅使用喺歷史上好重視男女關係，有時唔一定要坦胸露臂賣性感，可以係令人覺得用完個產品後，就會有個Romance Moment，同伴侶關係變得更好。個產品可以係番梘、洗頭水、車、飲品，只要佢營造個環境氣氛充滿想像空間就得，冇話邊種產品最啱用。亦因為呢個原因，所以Sex Appeal呢種廣告手法先咁常見。」

不過唔好以為廣告愈露骨成效就愈好，正所謂「食得魚翅多都想食下粉絲」，呢個道理套喺Sex Appeal上都一樣用得著。「過去咁多年成衣又好，內衣褲又好，都用好多性感Model，Underage又有，尺度好大又有，乜都有，以往的確係好Work。但近年有一個明顯嘅轉向，就係呢類型產品嘅廣告都轉用素人，同一啲擺明冇Photoshop過、冇Retouch過嘅Image。因為當網路世界嘅性感相咁泛濫，好易喺網上搵到J圖，性感相帶來嘅刺激對讀者而言已經細咗。」Exac7ly！因為Mean娜已經日日搵J圖搵到冇晒感覺……That's why家下連《Play Boy》封面都決定收返埋粒點，就係知大家已經睇到麻木晒……「《Play Boy》CEO都睇到個趨勢，當你喺Facebook都咁易搵到J圖時，個封面有冇露點又係咪咁重要呢？呢個亦引發廣告嘅轉變，愈來愈少極度色情嘅相片，反而係Sell種態度。」而事實都證明，呢種轉向更為大眾受落，因為唔係人人都有副Nice Body。

咁未來Sex Appeal嘅廣告會唔會再有新角度，打破舊有觀念呢？畢竟徐緣都唔係位預言家，未能答到你，但可以肯定，Sex Appeal絕對有效，如果唔係你又點會睇MenClub呢？ （笑）