疫情影響全球經濟，相信大家身邊都有人、甚至不幸係你本人要面對被裁員嘅問題。事實上，好多企業一旦遇上虧蝕、要減低成本，第一個方法都係諗裁員，但呢個方法又係咪真係對公司發展最好嘅方法？日本網民近日就搵返已故任天堂社長岩田聰於2013年一個股東大會上對於裁員嘅睇法，並大讚佢嘅經營理念。

圖片：Wikipedia

卻說2013年時，Sony即將推出PS4，而任天堂雖然剛剛推出Wii U，但銷售數字就唔算太好，於是財政報告上都係蝕錢。咁有人就喺股東大會問岩田聰，就話睇返收入，當年嘅數字同2000年數字其實係差唔多，但2000年有錢賺，2013年就蝕喎，咁即係成本高咗啦？所以其實係咪應該炒人呢？

而岩田聰就先回答指，蝕錢嘅其中一個主要原因，係日元強勢令到海外銷售所賺嘅錢兌返做Yen之後會少咗，同時喺日本進行嘅研發、生產成本又會相對多咗，而對於炒人，佢就話：「如果啲員工要花時間擔心冇咗份工，佢哋就冇時間開發出感動人心嘅遊戲。」

圖片：Taiwannews

佢繼續解釋：「很明顯地，我哋的確需要減少不必要支出，及尋求更有成本效益嘅做事方法，當然有啲公司就會話『我哋炒哂啲人，公司就會有錢賺』，但就係每一個部門每一個員工嘅貢獻加埋，先令到任天堂係依家嘅任天堂，我唔相信話『公司好困難呀，你走啦』，然後切走我哋嘅一部分，會係令公司長遠發展嘅好方法。」

「我嘅目標係減少不必要支出、尋求更有成本效益嘅做事方法、創造超出成本嘅收入。」

資料來源：blog.esuteru.com