現年39歲嘅「閃電俠」Dwyane Wade，於2019年完成「Last Dance」後便宣佈退役，至今都已經兩年時間。過去兩年，Wade都沒有完全離開NBA，而未來相信佢亦唔會離開，甚至更近，因為佢正式宣佈入主猶他爵士，成為當中嘅老闆之一。

爵士官方認證，Wade已經正式收購部份球隊股份，因此順理成章成為爵士嘅老闆之一，當然最大嘅老闆依然係Ryan Smith，另外嘅老闆亦有Ryan Sweeney、Atlasssian 執行長 Mike Cannon-Brookes等等。

係人都知Wade同熱火關係過去一路最密切，甚至係球隊嘅絕對隊魂，但今次竟然購入爵士股份實在令人意想不到。據指Wade係近日認識到爵士老闆，二人一拍即合，作為NBA傳奇嘅Wade今次入主甚至視Smith為佢投資方面嘅導師。

成為球隊老闆嘅Wade，將係繼「籃球之神」Michael Jordan(黃蜂)、「巨無霸」Shaquille O’Neal (帝王) 以及 Grant Hill (鷹隊) 之後又一位退役球星成為NBA球隊嘅老闆之一。當然除左Jordan真係球隊嘅大老闆之外，另外三位都只係球隊背後老闆團隊嘅成員之一而已。