細時聽前輩講，要判斷一個男人有無承擔有無責任感，睇佢有無「膊頭」。

用科學角度分析，上述說法當然欠說服力。不過，從傳統價值觀而言，膊頭夠橫夠厚兼胸膛寬挺，自然俾到人充足安全感。不少女士都認為，識得揀可依靠的終身伴侶，一定揀呢類。

 講衣著時尚潮流，尤其是西裝，已不太歡迎強調「安全感」嘅設計，越厚越橫嘅膊頭位設計，只會令人聯想到七、八十年代的美國及香港時裝電視劇（例如可能要問世伯先知嘅《豪門恩怨》Dallas或）的男主角。

誇張啲講，當年的西裝膊位闊度足以容納男士銀包有餘，絕對畀到你無限嘅安全感，但該類old-fashion設計，已經out到不能再out，連令尊翁出席飲宴或隆重場合時都不願再著！

 目前西裝興邊類膊位設計？

大概有以下 3種︰

第1種︰The Lightly Padded Shoulder

現時用於商務場合的西裝，膊位都設有薄墊，用以撐起膊位，而布料挺直程度，也令剪裁更加fit身，直接提升穿著者的自信。職場上，想要形營專業氣氛或味道時，最好選擇有pad設計，造型上可予人認真及專業感覺。

設有薄墊，無咁「蝦」人著，適合膊位「唔夠可靠」或體型偏瘦人士，這將有助穿者修靚薄位。

 第2種︰The Unstructured Shoulder

可稱作Soft Shoulder。該款膊位設計只會用上薄墊，甚至完全不加墊。

由於薄墊近乎隱形，膊位線條會明顯傾斜，膊位與袖位接駁時，線條會明顯smooth。

該款膊位設計，少數出現於正統西裝褸之中，因為它予人感覺太過casual。亦由於膊位偏薄嘅關係，設計師會特別遷就用到薄身物料，盡量做到easy to wear及增加靈活性，假日時穿上就最適合不過。

不過，膊頭唔夠厚人，就要識得遮醜，否則有頗大機會被人嫌。

第3種︰The Roped Shoulder

仲有，大家或較少留意，有一種西裝設計，近膊位的手袖位置，頭頂零零舍舍凸出嚟，再配合薄墊，望落似將膊位線條延長。該款設計特別多見於歐洲，尤其是意大利那不勒斯（Naples）地區，the roped shoulder已經屬於該地區專營訂造西裝服裁縫的象徵標誌，所以，又被稱作The Neapolitan shoulder。

膊位設計，影響整套西裝整體風格，亦代表formal程度，所以，gentlemen在購買西裝時，先要認清出席場合的性質、隆重程度先作最後決定。