近期廉航機票價格不斷回落，加埋港元強勢，去邊到都咁平，budget traveller自然最受惠，幾個月內不斷聽到身邊朋友去旅行，亞洲、歐洲通處飛，真高興。 

不過，部份廉航對乘客行李採「用者自付」原則，換言之，執行李要揀過度過。

但好多人都唔太知道，帶邊類衫褲配飾去旅行先最適合，或諗住求靚就乜都唔理，塞到一喼都係先算，但最後就好多衫褲都用唔著，盞搞！

以下嚴選5種服飾裝備，提議俾各位「巴打」外遊時作配襯穿搭之用︰

 1.麻質恤衫

如果去炎熱地帶，最好帶定幾件麻質裇衫，要薄身，易散熱之餘又幫手擋太陽以免曬燶。而最重要，大部份麻質裇衫都可以免熨。

 2.橡筋頭長/短褲

人在異地，當心情放鬆，意志力就會降低，美食當前就懶理自己六嚿腹肌變一嚿肚腩，食咗先算，橡筋褲頭就在此時大派用場，提供肚腩無限延伸之用。

 3.Loafer Shoes

波鞋依然是旅行首選，但有時都想轉吓口味，況且loafer連鞋帶都唔駛綁，一穿就可以走人，但又唔似得著拖鞋咁過份casual，非常適合一班旅行懶人。

 4.Clip-on太陽眼鏡

附有clip-on鏡片嘅眼鏡，最方便一班四眼朋友一物兩用，只須在眼鏡之上再夾上太腸鏡片即可，順帶一提，最好選擇有UV防曬功能，保護雙目最緊要。

 5.手提大袋

3日2夜短途行程，多半男士所要攜帶的同行物件都不會太多，會選擇揹Backpack取代拖喼，但為了免卻誤認為back-packer的話，可選擇手提大袋作hand-carry之用，望落都瀟灑點。