MenClub 為食小隊 (以Mean娜為首) 介紹得嘅Menu，一定係好食夾大件，仲要玩得開心先算過癮。威士忌Food Pairing成日得一件起兩件止嘅 Finger Food，或者薄切切嘅火腿片，成日都有種到喉唔到肺嘅感覺，終於，皇天不負有心人，俾我搵到間酒、菜俱佳嘅餐廳，佢就係位於灣仔嘅上海佬蟹莊啦!!

即日至月尾 (6月30號)，上海佬蟹莊都會提供一個威士忌Tasting Menu，從頭盤、主菜到甜品，都會有Glenlivet嘅各款作品做配搭，食飯之餘，順手做埋一個 vertical tasting，仔細品嚐12、15、18年，同埋Nadurra嘅醉人風味，玩得如此專業，絕對值得讚賞。事不宜遲，先同大家介紹個Tasting Menu :

頭盤 : 話梅花雕蟹、川味松葉蟹腳、特色蟹柑凍、金絲蟹餅
配酒 : The Glenlivet 12 年

Glenlivet 系列之中，較為年輕嘅12年擁有明顯清新花香，能夠展現出蘇格蘭 Speyside 嘅優雅個性，由美國橡木桶誘發嘅雲尼拿香甜，令酒液倍加順滑，配襯味道鮮甜，又唔會過於濃郁嘅頭盤就最好不過。四款精緻嘅食物入面，為食小隊最欣賞係特色蟹柑凍，上湯冷凍成糕狀，凝住紅花蟹嘅蟹肉、蟹膏，特別鮮甜開胃，飲一啖12年，再食一小口蟹凍，兩者韻味混然一體，非常正!

主菜 : 招牌茶壺鮮蟹湯、上海佬釀鮮蟹蓋
配酒 : The Glenlivet 15 年

上海佬釀鮮蟹蓋

講起Glenlivet 15 年最特別嘅地方係佢用咗French Oak 去陳釀，呢啲通常用嚟釀干邑嘅木桶相對密度較低，威士忌原液更易同木桶融合，產生奇妙嘅化學作用，加上釀酒大師準確控制時間，帶嚟非常creamy嘅酒體、柑橘、奶油、杏仁白蘭地、烘焙榛果等豐富香氣，配埋個香氣濃厚嘅鮮釀蟹蓋，洋蒽、芝士提供恰到好處嘅鹹香，成個 setting fit 到漏。

主菜 : 蟹粉珊瑚白玉球、椒鹽蒜片和牛面頰肉、黑松露鮑魚紅燒肉燴飯
配酒 : The Glenlivet 18 年

椒鹽蒜片和牛面頰肉

黑松露鮑魚紅燒肉燴飯

終於到高年份威士忌出場，The Glenlivet 18年係好多威士忌迷心中嘅至愛，首次、二次裝桶嘅美國橡木桶，加上歐洲雪莉桶嘅經典配合。前者提供極為豐富嘅果香、拖肥糖般嘅香甜風味，後者加添香辛、微苦，滲透橡木氣息，歲月加持之下，層次更深，極為複雜。鮑魚紅燒肉燴飯同呢枝作品有異曲同工之妙，又係兩種風味不同嘅食材，作一次細緻嘅配合，美酒、佳釀，講究嘅都係製成品之平衡度、一體性，食客、飲家可以從中發掘到無窮樂趣，又不至迷失。

甜品 : 黃金高力流沙、椰汁西米糕
配酒 : The Glenlivet Nadurra Oloroso

最後一定、一定不能 Skip 的甜品，前者係流沙包版高力豆沙，餡料亦從豆沙換成鹹蛋黃流沙，椰汁西米糕香甜可口，前者要趁熱食，後者要趁凍食，先後次序任君選擇。既然食物甜度咁高，咁威士忌一定不能味淡，好彩佢地揀咗用Glenlivet Nadurra，一款酒精度較高，採用非冷凝處理嘅作品，歐洲 Oloroso 頂級雪莉桶，演化出美妙嘅乾果、杏仁、肉桂、香料等風味，隨之而來嘅黑朱古力、奶油又添上一層甜美溫婉，伴甜品而上，餘韻悠長而舒適，做最後總結，最好不過。

地址 : 上海佬蟹莊，灣仔杜老誌道5號1樓
訂位 : 3125 3232
價錢 : Tasting Menu HK$729, Whisky Pairing 300

Photo : Sam @ MenClub