有人認為通訊科技發展拉近人與人之間嘅距離，但亦有人認為現代社會變得越黎越冷漠。而其中一個能夠體現呢種冷漠嘅，或者就係近年越黎越常見嘅「孤獨死」個案。近日「孤獨大國」日本就發佈一份關於「孤獨死」嘅官方報告，算係非常正式地披露情況嘅嚴重性。

圖片：visually_conscious on Flickr

據日本《ANN News》報導，日本警察廳早前首次公佈全國「孤獨死」個案統計數字，指出過去一年內，日本全國有超過7.6萬個「孤獨死」個案，當中七成以上死者都係男性、八成以上死者都係65歲或以上嘅長者。更令人驚訝嘅，係當中死者過世後超過8日先被發現嘅個案高達2.1萬，換言之近四份一死者都可能過住無正常社交嘅日子。

圖片：sese_87 on Flickr

其實日本自上世紀70年代就已經開始紀錄「孤獨死」個案，進入21世紀後因為日本社會高齡化、少子化、離婚率嚴重等因素疊加，導致孤獨死個案越見頻繁。2011年日本民間組織「ニッセイ基礎研究所」就推算指全國「孤獨死」案例達2.6萬宗；日本《讀賣新聞》於2016年嘅推算數字為4.6萬宗。最新嘅警視廳報告指出「孤獨死」案件主要以男性為主，亦令人關注男性長者嘅生活狀態。